Bugun “Alabuga Politex” tashkiloti mutaxassisi Nazar Tailyanov hamda Buxoro viloyati oliy ta’lim, fan va innovatsiyalar boshqarmasi boshlig‘i Azamat Naimov ishtirokida muhim uchrashuv bo‘lib o‘tdi.

Uchrashuv davomida Buxoro viloyatidagi 10 ta kasbiy ta’lim muassasasi va Rossiyaning “Alabuga Politex” tashkiloti o‘rtasida o‘zaro anglashuv memorandumi imzolandi.

Mazkur hujjat asosida tomonlar o‘rtasida 2+1 shakldagi qo‘shma ta’lim dasturlarini joriy etish, o‘quvchilarning yozgi amaliyotlarini tashkil etish, shuningdek, texnikumlarning ishlab chiqarish ta’limi ustalarini xorijiy stajirovkalarga yuborish masalalarida kelishuvlarga erishildi.

Uchrashuv yakunlariga ko‘ra, “Alabuga Politex” tomonidan o‘quvchilarning amaliyot o‘tashi bilan bog‘liq barcha xarajatlar “Alabuga Start” loyihasi doirasida moliyalashtirilishi, shuningdek, o‘quvchilar amaliyot davrida oylik ish haqi bilan ta’minlanishi belgilandi.

Mazkur tashabbus Buxoro viloyatida kasbiy ta’lim tizimining xalqaro integratsiyasini kuchaytirish, yoshlarning xorijiy ishlab chiqarish standartlari asosida tayyorlanishiga imkon yaratish, hamda o‘qituvchilar malakasini oshirishda muhim ahamiyat kasb etadi.

👉 Ushbu hamkorlik natijasida viloyat texnikumlarida tahsil olayotgan yoshlar uchun zamonaviy ta’lim muhiti, xalqaro amaliyot tajribasi, hamda kelajakda barqaror bandlik imkoniyatlari kengayadi.